Karakterar og vurdering

Terminkarakterar

Terminkarakterar får du når eit fag ikkje er avsluttande. Det er undervegsvurdering i eit fag og du kan ikkje klage på terminkarakteren.

Standpunktkarakterar

Standpunktkarakterar er karakterar som vert gitt ved avslutninga av opplæringa i eit fag og skal førast på vitnemålet. Elevar som ikkje har bestått eit fag (karakter 1) kan få høve til å gå opp til «særskilt eksamen» påfølgjande haust. Eleven er sjølv ansvarleg for å melde seg til eksamen og må ta kontakt med rektor innan 1. september same året for oppmelding til slik eksamen.

Elevar som har fått IV (ikkje vurdering) som standpunktkarakter i eit fag mistar eksamensretten i faget og må sjølv melde seg som privatist i dette faget. Eleven må ta kontakt med privatistkontoret for oppmelding til slik eksamen.

Fritak for fag og vurdering med karakter

Rektor kan, etter søknad og framlegging av dokumentasjon:

• frita elevar frå fag som inngår i fagfordelinga dersom eleven har bestått likeverdig eller meir omfattande opplæring i faget.
• frita elevar frå vurdering med karakter i skriftleg sidemål, i samsvar med forskrift til Opplæringslova.
• frita elevar frå kroppsøvingsfaget, om ein kan dokumentera at deltaking er til skade for eleven.
  Elevar med fritak i sidemålsvurdering har ikkje fritak frå faget. Dei skal fylgja faget og ha skriftleg undervegsvurdering utan karakter i faget.
  
  

Klage på karakter

Elevar som ynskjer å klage på standpunktkarakterane har 10 dagars frist (frå og med den dagen karakteren er gjort kjent for eleven). Eleven kan kreve grunngiving for karakteren før eleven avgjer om han/ho vil klage. Retten til grunngiving gjeld ikkje på skriftlege eksamenskarakterar.

Udir sin informasjon om klage på standpunktkarakter

Korleis klage?

Standpunktkarakter: Sjå instruksjonar

Eksamenskarakter: skriftleg klage, med underskrift, til rektor. Ved skriftleg eksamen treng du ikkje grunngi klagen, ved munnleg eksamen skal klagen grunngjevast.

Privatistar: skal klage til privatistkontoret.

Klagefrist

Klagefristen er 10 dagar. Fristen vert rekna frå den dagen du vart kjent med karakteren eller hadde høve til å verta kjent med karakteren. Det er i VIS karakterane vert offentleggjort fyrst.